Globalnytt 38 2000
Skoleavis for Norsk nettskole

Leder

 
Nettskulen engasjerer

- Dette vil vi høyre meir om.

- Nettskule er kjekt.

Dette er utsegner eg har fått høyre svært mange gonger sidan eg var så heldig å bli nettlærar og ha ansvaret for 4. klassingar både ved eigen skule og kring om i verda.

No er det gjerne slik at alt nytt er spanande og interessant i byrjinga og at interessa og gløden kanskje vil ta av noko etter kvart. Men engasjementet desse første vekene har vore gledeleg stort.

- Kva tid skal vi arbeide med nettskule, spør mine 4. klassingar stadig vekk. Dei har no fått presentert seg på sine sider, arbeider med e-post – og har fått den første kontakta med nettelevar. Frå nettelevar og foreldre kjem og tilbakemeldingar som tyder på at nettskule er eit godt tilbod og ei undervisningsform som kan engasjere.

- Dette vil vi høyre meir om, seier foreldra til vertselevane, og er glade for den tilleggskunnskap og kompetanse som nettskulearbeidet gjev deira born.

- Dette vil vi gjerne høyre meir om, seier oppvekstetaten og rektorane ved dei andre skulane i kommunen vår. Ei orientering om nettskulen står på sakskartet til neste rektormøte.

For ein debutant i nettskulearbeidet er det sjølvsagt både teknisk og pedagogisk litt av ei utfordring å prøve og leve opp til forventningane til foreldre og elevar og bevare gløden og engasjementet som ein ser er til stades.

Eg ønskjer meg difor framfor alt eit tett samarbeid med kommentarar og innspel frå desse i det vidare arbeidet, og vonar på at rettleiing og korreksjon også kjem ovanfrå i systemet om ikkje alt skulle gå like greitt.

Lars, nettlærar i 4. klasse.